介绍

Federer大陆译为费达拿，台湾译为菲尔特勒

费达拿嘅阿爸 Robert 系瑞士人，阿妈 Lynette 系南非人。佢哋喺同一间制药厂度做，喺一次生意差事中相识，之後结埋婚。费达拿重有一个大佢两年嘅家姐 Diana，系一个护士。

费达拿嘅成长道路上嘅偶像系碧加（Boris Becker）同埋艾堡（Stefan Edberg），之後最钟意嘅球员系森 柏斯（Pete Sampras），呢啲都系单手反拍嘅球员。

喺语言方面，费达拿能够讲三种流利语言：德文（母语）、法文、英文。

喺2000年嘅悉尼夏季奥林匹克运动会，费达拿识咗女朋友Miroslava Vavrinec。佢亦都系职业网球球员，喺 2000年奥运会中同费达拿一齐代表瑞士参加网球项目。佢哋喺2009年4月结婚。

2003年10月，费达拿开展以自己个名命名嘅男性化粧品事业。

2 003年12月，费达拿晌南非成立费达拿基金会，帮助贫困儿童（主要喺阿妈嘅家乡南非），以及促进世界青年体育嘅发展（主要系网球）。

2005年到2008年，费达拿连续四年得到「劳伦斯体育奖」年度最佳男子运动员。2007年4月，瑞士为佢发行邮票；瑞士好少为人物发行邮票，为在生嘅人发行邮票更加系少之又少，可见佢晌同胞心目中嘅超凡地位。

右手攞拍嘅费达拿喺网球方面好有天份，职业生涯非常成功。佢喺1998年7月转为职业球员，开始咗职业网球生涯，无几耐就跻身世界排名头100名。2004年2月2日，22岁嘅时候，费达拿第一次升上职业网球男子单打世界排名第一位，重一路保持到2008年8月。2007年2月26日打破美国名宿康纳斯（Jimmy Connors）嘅连续160周世界第一纪录。2005年胜出率达到0.9529（81胜4负），系自1984年嘅麦根莱（John McEnroe）之後最高，亦系1968年公开赛年代以嚟第三最高。

费达拿适应泥地以外各种场地条件，系名副其实嘅网坛「统治者」，因此几乎系所有比赛嘅冠军大热门。2008年费达拿因病毒感染，喺年初嘅澳网出局後，成年状态跌落谷底，更喺嗰年冇咗世界排名第一，61场草地连赢嘅记录亦喺温布顿决赛输畀拿度而告终。

但费达拿喺2009年卷土重来，先喺法网封王，成为史上第6位球员完成生涯大满贯，相隔一个月再重夺温布顿，成为史上夺得最多大满贯嘅球员，更重夺世界第一并维持到球季完，成为史上第二个可以重夺世界第一嘅球员。