介绍

祖高域系右手揸拍，4岁开始打波，2003年转打职业赛。Djordje同埋Marko ，根据南斯拉夫音准应当译为祖高域，佢比较偏重喺底线攻击打法，最大嘅优势系佢嘅抽波、发球同埋防守能力，佢嘅上网通常畀人认为系佢嘅一个弱点，所以佢好少用发球上网呢种技术。

大满贯

2011年球季

2011年开季，祖高域状态大勇。佢先喺3月超过咗瑞士嘅费达拿，再次升上男单排名第2，仅次於西班牙嘅拿度。一直到5月尾2011年法国网球公开赛开波之前，祖高域未输过一场比赛，连攞7项冠军（澳洲网球公开赛（硬地）、杜拜（硬地）、印第安韦尔斯（硬地）、迈阿密（硬地）、贝尔格莱德（泥地）、马德里（泥地）、罗马（泥地））。一路去到6月3号，喺2011年已经输过三次畀祖高域嘅费达拿喺法国网球公开赛嘅男单四强赛经过219分钟嘅大战，以7-6 6-3 3-6 7-6打赢咗佢，中断咗佢嘅开季41连胜嘅个人纪录（跨季就系43连胜纪录，由2010年12月台维斯杯开始）。呢次输波，令祖高域：(1) 挑战自己嘅第一个法网冠军失败；(2) 挑战世界排名第一失败；(3) 追唔到麦根莱（John McEnroe）喺1984年做出嘅开季42连胜纪录；(4) 追唔到Guillermo Vilas做出嘅46连胜同埋兰度（Ivan Lendl）做出嘅44连胜纪录。

经过一连串嘅赢波，喺2011年法国网球公开赛之後嘅6月6号宣布嘅世界排名入便，祖高域继续排喺第二，但系追到净系落後第一嘅拿度45分（拿度：12,070分；祖高域：12,025分）。

2011年7月初赢咗2011年温布顿网球公开赛男单冠军，单赛季战绩累积到49胜1负（胜率.980）；而世界排名积分升到13,285分，压赢拿度嘅11,270分，正式抢走拿度一哥位置。